HIZKUNTZA-PROIEKTUA

Miguel Altuna LHIIren eskaintza eleanitza da, non euskarak lehentasuna baitu. Ikaslearen profilaren arabera, gaztelaniazko eredua ere eskaintzen da, eta urtero ematen zaie ikasleei ingelesez 2 edo 3 modulu garatzeko aukera.

Irakasleak gai gara euskaraz eta gaztelaniaz lan egiteko. Helburua da gero eta irakasle gehiago gaitzea 3. hizkuntza batean lan egiteko (ingelesez, oro har).

Horrek guztiak plan estrategikoan du bere isla, eta euskarari dagozkionak Ulibarri programan xehatzen dira, atalez atal.

EUSKARAREN NORMALKUNTZA-PLANA

Azken urteotan, ahalegin eta aurrerapen handia egin dute EAEko ikastetxeek euskararen didaktikan, irakasleen hizkuntza-prestakuntzan, materialgintzan eta ikasleen ezagutzan eta erabileran.

Egindako urratsak sendotzeko eta ikastetxe-mailako hizkuntza-normalizazioa ahalbidetzeko plan osatu bat abian jartzeko beharra ikusi da.

Plan horrek, gauzatu diren proiektu partzialak biltzeaz gainera, eragile izan nahi du hizkuntza-komunitatea osatzen duten gainerako partaide helduen (irakasle, guraso, monitore…) arteko harreman-bizitzan.

Plan horrek ikastetxean euskarak duen errealitatea aztertzea izan behar du abiapuntu. Horretan oinarrituz finkatuko dira hurrengo urteetarako norabide eta helburuak, betiere kideen arteko adostasunez eta behar diren neurri zein baliabideak eskainiz. Ahalegin horretan ari dira Ulibarri programan bildutako ikastetxe guztiak beren Hizkuntza Normalizazioko proiektuen bidez.

Informazio gehiago: Miguel Altunako Euskararen Plan Estrategikoa